PROVINCIAL CAPITOL – Ginhingyo ni San Carlos City Mayor Rene Gustilo ang bulig sang National Bureau of Investigation (NBI) agud mausisa ang kapin P306.3 million nga balor sang tatlo ka flood control projects nga ginpahayag nga ginpatuman sa ila nga ciudad.
Nakabaton ang alkalde sang sulat nagikan sa Department of Public Works and Highways (DPWH) Central Office nga nagapangusisa kun napatuman ang tatlo ka proyekto sang tatlo man ka mga contractors nga lunsay gikan sa Luzon.
May gin-apid nga certificate of acceptance nga pirmado sang isa ka engineer kag ni Mayor Gustilo apang ginpanginwala sang alkalde nga nakalagda ini sa amo nga dokumento.
Ang ginatumod nga mga proyekto ang ginalakipan sang flood control project sa Barangay Palampas nga balor P151.5 million nga gin-award sa Apo General Construction gikan sa Mountain Province, subong man sa Andoon River nga balor P77.5 million nga gin-award sa EKC Construction gikan sa Benguet kag P77.3 million sa Higalaman River sa Barangay Guadalupe nga gin-award sa Jaben Contracting Engineering Services gikan man sa Benguet.
Sang gin-usisa sa DPWH District Office, ila gin-deny nga nagaeksister ang amo nga mga proyekto sa idalom sang ginhingadlan nga mga contractors.
Apang ila ginkumpirmar nga may ginpatuman nga mga flood control projects sa nasambit nga mga lugar apang lunsay ginaobra ini sang contractors gikan sa Bacolod City.
“Siguro ang nagkalatabo, himu-himuan nila kag kung wala abe nag-confirm ang naitona office diri, makuha nila ang budget, makuha nila ang kwarta..ghost projects sa ila nga part”, pahayag pa ni Mayor Gustilo.
Bangud sini, ginhingyo ni Mayor Gustilo ang ila nga City Legal Office nga magsulat sa NBI agud maimbestigahan ang nasambit nga mga proyekto.