Halos tanan nga ahensya sang gobyerno ang nakaplastar na sang ila regional offices sa Negros Island Region (NIR) magluwas gid lamang sang pila ka ahensya particular ang tatlo gid sa attached agency sang Department of Transportation nga tubtob sa karon, wala pa sang regional offices.
Ini ang ginalakipan sang Land Transportation Office (LTO), Maritime Industry Authority (Marina) kag Land Transportation Franchising and Regulatory Board (LTFRB).
Nahibaluan ang Department of Budget and Management (DBM) nagpagwa sang circular nga naga-require sa tanan nga National Government Agencies nga may mandato kag serbisyo sa Negros Island Region (NIR) nga dapat makapahamtang sang ila mga opisina on or before July 31, 2025.
Ang deadline isa ka klaro nga cut-off date para masiguro nga pagsulod sang Fiscal Year 2026, operational na ang NIR offices kag fully integrated na ang serbisyo para sa mga pumuluyo sang Negros Occidental, Negros Oriental, kag Siquijor.
Ini nga requirement nagasunod sa Republic Act No. 12000 ukon ang NIR Act, nga nagatukod sang Negros Island Region bilang ika-17 nga rehiyon sa Pilipinas.
Apang ang 3 ka ahensya ang wala pa sang regional office sa NIR agud kon tani masiguro nga ang mga serbisyo sang gobyerno accessible kag available mismo sa sulod sang isla.