PROVINCIAL CAPITOL – Nagakabalaka si Punong Barangay Joselito Martinez Jr. sang Barangay Biaknabato, La Castellana sa padayon nga presensiya sang nagtig-a nga lahar sa Tamburong Creek rason sang pagtapan sang suba.
Ginpahayag ni Kapitan Martinez nga ang barangay kag ang MDRRMO La Castellana ang pareho nga nagpasar sang resolusyon nga nagahingyo sang special permit agud makapatigayon sang dredging sa suba.
Gin-aprubahan ang amo nga request apang ginbalabagan ini sang Protected Area Management Board (PAMB) paagi sa ila nga Resolution No. 17 kun sa diin sa pihak nga ginatugutan ang dredging, ginadumilian naman ang pag-quarry ukon ang pagdala sang makalkal nga balas kag bato sa iban nga lugar.
Nagakabalaka si Martinez nga kun magtupa ang mabaskog nga ulan, magaluntad ang baha indi lamang sa Barangay Biaknabato kundi subong man sa Barangay Cabacungan sa naubos nga bahin.
Nagahingyo sa karon si Punong Barangay Martinez kay Mayor Añejo Nicor nga magpatunga agud tigayon na nga makuha ang lahar kag liwat magdalom ang suba.
Nahibaluan nga ang puno sang Tamburong Creek ang halin mismo sa ibabaw sang baba sang Bulkan Kanlaon rason nga ang tanan nga abo kag bato nga ginluad sini ang nagtupa sa Barangay Biaknabato.