Ginpasidunggan ni Negros Occidental Governor Bong Lacson ang isa ka Murciahanon nga PWD pinaagi sa paghatag sang Medal of Excellence matapos ini naggradwar nga Magna Cum Laude. Si Kyla Grace Guzon, ang scholar sa idalom sang Negros Occidental Scholarship Program for Persons with Disabilities (PWDs). Siya ang nagpamatuod nga wala sang upang sa tawo nga nagapaninguha kag may handum sa kabuhi. Si Kyla ang isa ka residente sang Brgy. Canlandog, Murcia. Nautod ang isa sini ka tiil bangud sang iya balatian nga cancer apang karon, survivor na ini. Sa pihak sang pagpanghangkat, natigayon ini nga maka-graduate sa Bachelor of Arts in English Language Studies sa Catholic Ming Yuan College, Murcia. Ang nangin kadalag-an ni Kyla ang testamento sang kabakod kag pagpaninguha sang isa ka tawo nga determinado para malab-ot ang handum sa pihak sang pisikal sini nga limitasyon.
