Ginklaro sang Silay City LGU nga wala sila nagapamalabag ukon nagapakatig-a sa paghatag sang Resolution of No Objection (RONO) sa Provincial Government para sa Bulk Water Project.
Sa interview sang DYHB kay Silay City Sangguniang Panlungsod Committee Chair on rules kag Environment and Natural Resources Mykol Velez, ginpahayag sini nga August 13 sang nabaton sang SP ang request for RONO halin sa Provincial Administrator’s office apang ginbalik nila ini bangud wala sang pirma ni Negros Occidental Governor Eugenio Jose “Bong” Lacson. Ila man gin-ayo nga kay Silay City Mayor Joedith Gallego ini mismo ipadala kay ang alkalde na ang bahala mag-refer sang request sa ila.
Asta karon, amo pa ini ang ginahulat sang LGU. Sa tion nga mahitso na ini, gilayon nga igatake-up ini sang committee ni Velez kag diri na magasunod ang public hearing.
Suno pa sa konsehal, wala nagasara ang pwertahan sang ciudad sa ini nga proyekto. Ang ila lang gid nga panindugan amo ang pamatian man ang ila nga bahin sa diin imbes nga sa Hinalinan-Imbang river kuhaon ang tubig para sa nasambit nga proyekto, mas maayo kun sa Malugo river nalang ini kuhaon.
Suno kay Velez indi makasarang ang Imbang river ang 400 Million Liters a Day (MLD) bangud nga base sa ila nangin eksperyensya, halos nagakahubsan ini tubig kada tig-ilinit. Mabudlay para sa mga tawo nga nagasalig sang ila mga palangabuhian sa ini nga suba.
Dugang pa ni Velez, mas gusto ni Mayor Gallego nga sa Malugo river na lang kuhaon ang tubig bangud sobra-sobra pa ang 400 MLD nga ila kinahanglanon nga supply.
Palamangkutanon karon para sa konsehal kun ngaa gina-insister gid sang probinsya ang Hinalinan-Imbang river?
Kun may study gid man nga ginpatigayon ang probinsya naangut diri, nagakaangay lang nga i-validate liwat kun masarangan gid man bala matuod sang suba nga kuhaan sang 400 MLD.