PROVINCIAL CAPITOL – Personal nga magapadulong sa Department of Public Works and Highways Central Office ang assistant district engineer sang 5th District Engineering Office agud hibaluon ang update sa ginaalegar nga tatlo ka ghost projects sa San Carlos City, Negros Occidental.
Ginpahayag ni ADE Engineer Pedrito Bautista nga nagsulat si District Engineer Juan Alfonso Jorbina, nga napetsahan Agosto 18, para kay DPWH Procurement Service Director Ma. Victoria Gregorio.
Si Gregorio ang una nagsulat kay San Carlos City Mayor Rene Gustilo agud i-verify kun matuod nga napatuman ang proyekto nga gina-claim sang tatlo ka mga contractor sa ila nga ciudad.
Ang ginatumod nga mga proyekto ang ginalakipan sang flood control project sa Palampas River nga balor P151.5 million nga gin-award sa APO General Construction gikan sa Mountain Province, subong man sa Andoon River nga balor P77.5 million nga gin-award sa EKC Construction gikan sa Benguet kag P77.3 million sa Higalaman River sa Barangay Guadalupe nga gin-award sa Jaben Contracting Engineering Services gikan man sa Benguet.
Nahibaluan nga ginpanginwala ni Mayor Gustilo nga napatuman ang amo nga mga proyekto ang iya ciudad kag ginpanindugan nga ginpeke ang iya nga pirma nga ginsumiter sang nasambit nga mga contractors.
Suno kay Bautista, luyag nila nga mahibaluan kun ano na ang nangin tikang sang DPWH Central Office angot sa issue.