Isa ka babayi sa China nga guilty sa kaso sang pagpanunto ang nakalikaw sa iya lima ka tuig nga sentensya matapos ini nagpabusong halos kada-tuig! Base sa report sang South China Morning Post, ang babayi nga si Alyas Chen Hong ang gin-convict sang fraud sang December 2020 sa Shanxi province. Apang, nakalikaw ini sa pagserbe sang sentensya bangud nga nagbusong siya sang tatlo ka beses sa sulod sang masobra apat ka tuig. Sa China, ang mga indibidwal nga may penalidad nga pagkapriso ang mahimo nga magserbe sang ila sentensya sa gwa sang prisohan kun may seryoso sila nga medical conditions kaangay kun nagabusong ukon may lapsag, kag ang mga indi na makasarang nga mag-atipan sang kaugalingon. Kinahanglan pa ang approval nagikan sa korte, kag kun pasugtan, ipaidalom sila sa istrikto nga supervision sang ila community correctional institutions. Naggwa sa inspection nga ginhatag ni Chen ang iya bag-ong bun-ag nga ikatatlo nga anak sa iya bayaw. Gin-ako man niya nga ginbulagan niya ang iya bana. Nagapati ang local public prosecutor nga ginhungod ni Chen nga magpabusong agud nga makalikaw ini sa prison sentence. Nahibaluan nga ginbalik siya sa detention center sa baylo nga sa prisohan agud nga matapos ang iya jail term.
