Ginklaro ni Bacolod City Congressman Albee Benitez nga wala ini sang kaangtanan sa Victoriasanon nga tag-iya sang Legacy Construction Corporation nga amo ang top contractor nga nakakuha sang 22% ukon P100 billion nga balor sang Department of Public Works and Highways (DPWH) flood control projects.
Ang tag-iya sang kumpanya ang ginkilala kay Alex Abelido nga amo ang nag-uyat sang kapin P545 billion flood control projects halin pa sang 2022.
Sa exclusive interview sang DYHB kay Benitez, ginpahayag sini nga nakahibalo lamang siya nga tumandok sang Victorias City si Abelido kag anak sang isa ka official sadto sang Victorias Milling Corporation (VMC) apang wala gid siya personal nga nakakilala diri.
Ginklaro man ni Benitez nga indi sini paryente si Abelido kag wala man ini nagsuporta sa iya sa pulitika.
Dugang pa sini nga madamo sang proyekto ang Legacy Construction indi lamang sa ciudad sang Bacolod kundi sa palibot sang Negros Occidental kag lehitimo ang amo nga korporasyon bangud nga kumpleto man ang dokumento kag mga lisensya sini.
Isa sa mga local projects sini amo ang legislative building kag Bacolod City General Hospital nga suno kay Benitez, nag agi sa bidding kag tanan nga legal nga proseso.
Lecacy Construction Corp., fb