Magahatag sang deretso nga bulig sa kabarangayan ang gintukod nga Bacolod Governance and Grassroots Services for Barangays (G-SERVE) Program sang administrasyon ni Mayor Greg Gasataya.
Ang G-SERVE gintukod paagi sa Executive Order (EO) 010 Series of 2025 sa diin maga-operate ini sa idalom sang City Mayor’s Office – Public Affairs and Assistance Division (CMO-PAAD) kag ginbutang nga in charge si Executive Assistant Ayesha Joy Villaflor.
Suno kay Villaflor, isa ini ka flagship program sang Gasataya administration sa diin sila ang magahatag sang bulig pinaagi sa pag-facilitate sang mga requests sang kabarangayan sa ciudad.
Magluwas diri, magahatag man ang G-SERVE sang administrative kag technical support sa plano kag pag-implementar sang mga proyekto sang ciudad panaog sa mga barangay.
Sa idalom sang G-SERVE, maga-assist man ang ciudad sa pag-implementar sang community-based projects kaangay sang sports, food production, livelihood programs, beautification, pagpaninlo kag sanitation.
Nalakip man diri ang pagsuporta sa community empowerment initiatives kag partisipasyon sang pumuluyo sa local governance. | DYHB News