BACOLOD CITY- Napasaka na ang kaso nga murder batok sa hinablos nga nagbuno sa iya tiyo sang tinalikdan nga Agosto 18 sa Purok San Miguel Barangay Sum-ag sa ciudad sang Bacolod.
Ang biktima nga tiyo sang suspek ang ginkilala nga si alias “Mabini”, 44-anyos, samtang ang suspek amo si alias “John Paul”, 25-anyos, kag pareho residente sa amo nga lugar.
Ginpahayag ni Police Captain Andy Ofalia, Station Commander sang Police Station 9, ginkabig nga case closed na ang amo nga insidente bangod natigayon na mapasakaan sang kaso si John Paul.
Nahibaluan, nagluntad ang insidente samtang nagapungko ang biktima sang hinali ini ginbuno sang suspek sang makapila ka beses.
Nakaagom sang apat ka stab wounds ang biktima nga gintunaan sang iya kamatayon.
Base sa pagpangusisa sang kapulisan, gina-alegar nagpangimuon ang hinablos sa iya nga tiyo bangod sa suspetso sini nga may relasyon si Mabini kag iya asawa, apang nadiskubrihan nga misunderstanding lamang ang natabo, suno kay Ofalia.