Nakaagom sang pilas sa nagkalain lain nga parte sang iya lawas ang 45-anyos nga lalaki matapos nga ginbuno sa Bonifiacio Tanke, Barangay 2, Silay City, Negros Occidental alas-5:14 sang hapon, Agosto 23, 2025.
Ginkilala ang biktima kay alyas “Nick” samtang ang suspek naman amo si alyas “Mario”, 71-anyos nga pareho residente sang nasambot nga barangay.
Sa inisyal nga imbestigasyon sang Silay Component City Police Station, nagalakat ang biktima sa sagwa sang iya balay sang hinali lang ini nga ginsumbag sang suspek kag naigo sa tuo nga parte sang tiyan.
Wala naman sang inaway sa tunga sang duha matapos ang amo nga insidente kag nagpuli na lamang ang biktima.
Apang, ginsundan sang suspek ang biktima kag ginbuno sa wala nga butkon, dughan, kag wala nga liog.
Gindala ang biktima sa City Health One Hospital sa nasambit nga ciudad para sa nakaigo nga pagbulong.
Samtang, naaresto naman sang Silay CCPS ang suspek para sa nakaigo nga disposisyon.