Nautas ang kabuhi matapos ginpaarakan luthang ang driver sang Bacolod Cosmopolitan Christian Church sa atubang mismo sang amo nga simbahan sa bahin sang Circumferential Road sakop sang Barangay Taculing, pasado las-11 sang aga, Domingo, Agosto 24.
Ang biktima ang ginkilala nga si Efren Banagloryoso, 59-anyos, kag residente sang Barangay Granada sa ciudad.
Ginpahayag ni Police Captain Rosalindo Pugoy Jr., Station Commander sang Police Station 6, base sa inisyal nga imbestigasyon ang gunman ang nagasakay sa gina-alegar Montero Sports nga nagaduag itom nga naga-usoy sang dalan nagikan sa Norte padulong Sur apang nag u-uturn ini kag nagpundo sa unhan sang biktima.
Ginpatihan nanaog ang gunman nga nagapungko sa passenger seat sang salkayan nga nagasuksok sang longsleeves nga multi-color kag may tabon ang nawong, kag gilayon nga ginpaarakan luthang ang biktima.
Si Banagloryoso ang nagikan sa sulod sang compound sang simbahan antes ang krimen kag nagwa bangod manug tapos na ang panimbahon.
Gilayon naman nga nagpalagyo ang suspek matapos ang ginhimo nga krimen.
Suno kay Pugoy, yara sa kapin duha ang suspek, isa amo ang gunman kag ang isa amo ang driver sang salakyan.
Nakaagom sang gunshot wounds sa ulo, likod, kag dughan ang biktima nga gintunaan sang iya kamatayon.
Nakarekober sang kapin anom ka basiyo sang bala ang awtoridad sa crime scene.
Sa karun padayon ang imbestigasyon sang kapulisan angot sa amo nga insidente.