Nautas ang kabuhi sang isa ka mangunguma matapos nga ginlabo sa pareho man sini nga mangunguma bangud sa ginakultibar nga duta sa Sitio Pasto, Purok 5, Barangay Basak sa banwa sang Cauayan.
Ginkilala ang biktima kay alyas “Romel”, 44-anyos samtang ang suspek naman amo si alyas “Jay-R”, 26-anyos nga pareho mga residente sang nasambit nga barangay.
Suno sa inisyal nga imbestigasyon sang Cauayan Municipal Police Station (MPS), naga-inom sang tuba ang biktima kaupod si alyas “Russel” sang nag-abot ang suspek.
Sinukmatan sang suspek ang biktima nahanungod sa duta nga ginakultibar kag ini ang nagresulta sa pagbina-isay sang duha.
Didto na ginlabo sang suspek ang biktima nga naigo sa nagkalain lain nga parte sang iya lawas.
Gindala pa ang biktima sa Cauayan District Hospital apang ini ang gindeklarar nga dead on arrival.
Naaresto naman ang suspek kag yara na ini sa kustodiya sang Cauayan MPS para sa nakaigo nga disposisyon.