Ginpahayag ni Punong Barangay Armando Vito sang Granada, Bacolod City nga wala sang malain nga record sa ila barangay si Efren Banaglorioso, ang ginluthang ka nautas ang kabuhi pasado alas-11 sang aga, Agosto 24, 2025 sa bahin sang isa ka simbahan nga nahamtang sa Circumferential Road, Barangay Taculing syudad sang Bacolod.
Si Efren ang nakaangkon sang madamo nga igo sang bala halin sa suspek nga sakay sa isa ka itom nga SUV.
Sa interview sang DYHB kay PB Vito, ginpahayag nga naga-istar si Efren upod sa iya sini pamilya sa Prk. 6, Barangay Granada kag ini ang isa ka caretaker sang property nga nahamtang sa nasambit nga Barangay kag nagatrabaho man bilang isa ka driver sang simbahan sa Barangay Taculing.
Sa karon blangko pa sa gihapon ang kapulisan sa identity sang mga suspek kag kun ano gid ang motibo sa pagpangluthang.