Isa ka 30-anyos nga Mexicana nga wala sang eksperyensya kag kagamitan sa pagdalagan ang nakadaog sa 63-kilometers (39 ka milya) nga ultramarathon samtang nagasul-ob lamang sang sandalyas kag tradisyonal nga panapton sang ila tribu.
Sa rekord nga 7 ka oras kag 34 minutos, si Candelaria ang nagdaog sa 63-kilometro sa female category sang Canyons Ultramarathon sa Guachochi, Mexico, bisan wala sang bisan ano nga kagamitan sa pagdalagan kag wala man sang pormal nga training magluwas sa iya adlaw-adlaw nga kabuhi sa kabukiran. Si Ramos isa ka miyembro sang mga Rarámuri, isa ka katutubo nga grupo sa rehiyon sang Chihuahua nga kilala sa ila tradisyon sang pagdalagan sang malayo kag “persistence hunting.”
Kilala ang Rarámuri sa ila daw “superhuman” nga kusog kag pag-antos sang kasakit, bisan pa wala sang moderno nga kagamitan, makalampuwas sila sa mga propesyonal nga atleta.
Sa isa ka talagsahon nga pagpakita sang natural nga talento kag wala untat nga kusog, si Candelaria Rivas Ramos sang Choreachi nakasulat sang kasaysayan sa 2025 Canyons Ultramarathon sa Guachochi. Wala pa siya nakasulod sang bisan ano nga marathon antes sini, pero bangud sa pagsuporta sang ila komunidad, nagbiyahe siya upod sang iya bana halin sa Choreachi padulong Guachochi, naglakat sang 14 ka oras nga wala untat.
Pagkatapos sang ini nga mabudlay nga pagbiyahe, nadalagan niya ang 63-kilometro nga ultramarathon nga nagasul-ob sang tradisyonal nga bayo sang Rarámuri kag handmade nga sandalyas.
Pahayag sini nga para sa iya pamilya ang iya ginaubra.
Si Candelaria indi amo ang una nga Rarámuri nga nagdaog sang ultramarathon sa Mexico. Sang 2017, isa ka babayi man nga nagahingalan María Lorena Ramírez nga nagasagod sang karnero ang nagdaog man sang 50-kilometro nga ultramarathon.