Isa ka akig nga customer sa isa ka restaurant sa Los Palacios y Villafranca, Spain ang gin-aresto sang mga otoridad matapos nga ginaalegar ginsunog sini ang establisyemento bangud ginsilingan ini sang mga empleyado nga wala na sila sang mayonnaise. Isa ka adlaw, ang mga empleyado kag mga parokyano sang isa ka cafè sa banwa sang Los Palacios y Villafranca, Seville, ang ginkulbaan matapos nga ang isa ka lalaki nga nagbubo sang gasolina sa bar kag ginsunog ang establisyemento. Antis sini, ang lalaki, nga wala nagpalayag sang iya pangalan ang nagkadto sa resto upod ang iya anak kag nag-order sang duha ka sandwich. Nakita sa surveillance camera nga nagtindog siya halin sa iya lamisa kag nagpakig-istorya sa isa ka waiter. Suno sa report, nangayo siya sang mayonnaise para sa iya sandwich, apang ginsugiran siya nga indi na ini available. Nangayo pa ini liwat sa isa ka waiter apang amo man sa gihapon ang sabat, rason nga ginhalinan niya dayon ang kapehan, nagkadto ini sa lapit nga gasolinahan, kag nagbalik dala ang isa ka botelya nga gasolina. Suno sa lokal nga balita, ginpamangkot liwat sang lalaki ang mga empleyado kon may ara sila sang iya paborito nga mayonnaise , kag sang sabton ini liwat nga wala, iya gilayon nga ginbubo ang 1.5-litro nga gasolina sa bar kag ginsindihan ini. Halos puno sang mga tawo ang kapehan sang tion nga natabo ini, kag gilayon naman nga nag ginuwa ang tanan sang ila nakita ang kalayo, upod na ang lalaki nga mahilig sa mayonnaise. Maayo lang kay gilayon nga napalong sang mga empleyado ang kalayo gamit ang fire extinguisher. Sa tunga sang kagamo, nasunog ang wala nga kamot sang suspek kag nagpalagyo apang nalaot siya kag gin-aresto sang kapulisan. Samtang ginabulubanta nga naglab-ot sa $9,500 ukon tunga sa milyon ka peso ang halit sang sunog.
