BACOLOD CITY- Possible nakuryente ang bangkay nga nasapwan sa Purok 8, Barangay Tangub sa ciudad sang Bacolod, pasado las-2 sang hapon, Agosto 27.
Ang biktima ang ginkilala nga si Jerecho Perolino, legal ang edad kag residente sa amo nga lugar.
Ginpahayag ni Police Captain Greeky Cayao, Station Commander sang Police Station 8, nakita ang pilas sa tuo nga kamot ni Perolina nga kaangay sang napaso.
Sa pagpangusisa sang kapulisan sa lugar, ang biktima ang nakita las-11 sang aga nga naghunos sang kable sang kuryente sa isa ka balay.
Gina-alegar nga ang nakita nga pilas ukon paso sa kamot sang biktima bangod iya nakaptan ang wire.
Suno ka Cayao, possible matapos makuryente ang biktima nagkadto ini sa lugar kun sa diin siya nasapwan, kag didto ginbawian sang kabuhi.
Narekober sa bulsa sang biktima ang totter, sachet sang ginapatihan shabu, kag plier.
Dugang pa ni Cayao, wala sang may nakita nga foul play ang kapulisan sa inisyal nga imbestigasyon.