BACOLOD CITY- Magluwas sa mistaken identity, may isa sa karun ka anggulo nga ginalantaw ang Bacolod City Police Office angot sa pagluthang sa driver sang simbahan sa Circumferential Road sakop sang Barangay Taculing sang tinalikdan nga Agosto 24.
Ang biktima ang ginkilala nga si Efren Banagloryoso, 59-anyos, driver sang Bacolod Cosmopolitan Christian Church, kag residente sang Barangay Granada.
Ginpahayag ni BCPO Director Police Colonel Joeresty Coronica, indi pa sa karun mapalayag kun ano ang isa ka anggulo nga ila ginalantaw angot sa pagluthang kay Banagloryoso bangod padayon ang ila nga imbestigasyon.
Padayon man ang pagtipon sang kongkreto nga basehan angot sa amo nga anggulo, bangod kun mistaken identity ang pagluthang sa biktima isa sa karun nga palaligban nga kun sin-o ang naghimo sini.
Suno kay Coronica, sa amo nga kaso, dako ang bulig sang CCTV footage agod mataod-taod ang impormasyon nga ila natipon.
Nagtukod naman sang Special Investigation Team ang BCPO angot sa pagsolbar sang amo nga kaso nga ginalakipan sang Investigator kag Intell Officer sang Police Station 6, kag yara man ang pila ka mga personnel sang City Investigation and Detection Management Unit, kag City Intelligence Unit sa pagpanguna sang Deputy City Director for Operation.