Ginaduso sa karon sang Department of Agriculture (DA) ang pagpanumbalik sang mga key regulatory powers sang National Food Authority apang indi ang awtoridad sa pag-import sang bugas. Ginklaro ni DA Secretary Francisco P. Tiu Laurel Jr. sa ginpatigayon nga hearing sang Senate Committee on Agriculture nga magapabilin sa pribado nga sektor ang importasyon sang bugas. Apang, ang mga private importer kinahanglan na karon nga mag-share sang responsibilidad sa pagmentinar sang rice buffer stock sang pungsod. Sa idalom sang ginaproponer nga setup, ang pag-import sang bugas magasunod sa isa ka kontrolado nga modelo kaangay sang programa sa pag-import sang kalamay sang Sugar Regulatory Administration, sa diin ang mga kwalipikado lamang nga mga importer ang ginahatagan sang alokasyon sa pag-import. Samtang, ang mga importer, sa baylo, obligado sa pagbakal sang palay gikan sa lokal nga mga mangunguma sa makatarunganon nga presyo para sa buffer stocking.
