NEGROS ORIENTAL- Nautas ang kabuhi sang isa ka iloy nga delivery rider matapos nahulog sa pil-as ang ginamaneho nga motorsiklo sa Sitio Nagpintal, Brgy. Balayong, sa banwa sang Pamplona, Negros Oriental, pasado las-9 sang aga, Agosto 26.
Ang nagtaliwan nga driver sang motorsiklo ang naga-edad 18, kag residente sang Brgy. Nangca, Bayawan City; samtang ang pilason nga angkas sini amo si alias “Rose.”
Base sa nakuha nga impormasyon sang DYHB sa Pamplona Municipal Police Station, natalana kuntani magdeliver ang duha sang mga produkto kaangay sang cellphone, bag, tent, kag iban pa sa Poblacion.
Samtang naga-usoy ang duha sa nabukid nga bahin sang amo nga banwa, gina-alegar nadulaan sang kontrol ang driver sa dululhugon kag kurbada nga bahin sang dalan, rason nga nahulog ini sa pil-as nga may kadalumon nga ginabulubanta 100 tubtob 200 ka metro.
Ginhingagaw dala sa ospital ang driver, apang ini ang gindeklarar nga dead on arrival, samtang ang backrider ang nagapabilin nga nagapaayo sa ospital.