Nagpanindugan si Mona Dia Jardin nga indi ini magbiya bilang general manager sang Bacolod City Water District (BACIWA).
Ini ang panindugan ni Jardin matapos gindeklarar na sang board nga nag-expire na ang iya termino kag ginpahalin sa pwesto bangud sang loss of confidence.
Sa press conference sini nga hapon, ginsiling ni Jardin nga nahangpan sini nga ang iya pagpungko bilang GM ang yara sa pleasure sang board kag handa ini magbiya sa pwesto kon nag-agi naman sa due process.
Ginpahayag ni Jardin nga kon ginsunod ang due process, dapat may yara sang formal complaint batok sa iya, may notice of hearing kag investigation.
Apang suno diri, wala ini nasunod bangud sang Agosto 22 lamang ginhimo ang resolution kag ginserbe gilayon sa iya kag wala siya nahatagan tion nga magsabat.
Suno kay Jardin, sa 2028 pa maga-expire ang iya termino santo sa rules sang Civil Service Commission (CSC).
Sa issue sang pagbakal sang eco park sa Alangilan nga isa sa mga gintudlo rason sang board sa pagkakas sa iya sa pwesto, ginsiling ni Jardin nga may board resolution nga naga-authorize sa iya sa pagpangita, pag negosyar kag pagbakal sang duta kag mangin ang pagbayad diri.
Ginpanindugan ni Jardin, nga ang iya trabaho amo lamang ang pag-implementar sang mga desisyon sang board.
Kasunod, sini ginpalayag ni Jardin nga adlaw-adlaw ini nga maga-report sa trabaho kag may ginaplano naman nga legal actions. | DYHB News