PROVINCIAL CAPITOL – Hugot nga ginapanginwala ni Mayor Benjie Miranda nga may kahilabtanan siya kag ang ila nga City Government sa flood control project sa Hilabangan Irrigation Project sa Kabankalan City.
Ini sa tunga sang mga reklamo nga wala gintapos ang proyekto kag ginadudahan nga kabahin ini sang mga flood control projects sang DPWH nga gina-imbestigahan.
Suno kay Mayor Miranda, wala siya sang kaangtanan sa proyekto kag wala man ini nag-agi sa City Hall.
Base sa disclosure board sa lugar, ang rehabilitation/major repair sang drainage structure-rehabilitation sang naga-eksister nga drainage canal sa Hilabangan Irrigation Project ang gin-award sa Sant’yago Enterprises.
Ginpunduhan ini sang P14,626,498.60 nga ginkuha sa General Appropriations Act kag ginpatuman sang DPWH Negros Occidental Third Engineering Office.
Base sa board, ginsugdan ini sadtong Pebrero 24 kag nahuman sadtong Hulyo 30 apang suno sa alkalde, wala natapos ang proyekto.