Agud nga masiguro nga may suspisyente nga supply sang tubig ang mga konsumidor bisan pa sa tunga sang brownouts, ginduso ni Councilor Atty. Caesar Distrito ang ordinansa nga maga-require sa Baciwa-PrimeWater nga mag-install sang standby generators sa tanan sini nga mga pumping stations sa ciudad.
Ang ini nga ordinansa amo ang “Permanent Power Generators on Pumping Stations Ordinance of Bacolod City,” sa diin aprubado na ini sa first reading sang Sangguniang Panlungsod.
Suno kay Distrito, kada may power outage, linibo ka mga pamilya, ospital, eskwelahan kag mga negosyo ang nagaantos bangud nga wala man sang tubig.
Pinaagi sa ini nga ordinansa, luyag sini nga matuldukan kag masolusyunan na ang ini nga problema.
Sa idalom sang ini nga proposed ordinance, mandated ang Baciwa-PrimeWater nga magpahamtang sang pumping stations nga may standby generators nga automatic nga naga-switch on kada may power outage agud masiguro nga magapadayon lang ang water distribution.
Pagahatagan sang 60 diyas ang kumpanya halin sa effectivity sang ordinansa agud umpisahan ang installation. Ang full compliane sini ang pagalauman sa masunod nga duha ka bulan.
Pinaagi sa Bacolod City Water Monitoring Committee, ila pagatutukan ang pag-implementar sang ordinansa.
Kun mapaslawan ang Baciwa-PrimeWater sa pagsunod sini, sila ang pagahatagan sang penalty nga ₱5,000 per day para sa non-compliance kag iga-refer man sa Local Water Utilities Administration (LWUA) para sa dugang pa nga regulatory sanctions.
Ginpaathag ni Distrito nga ang ini nga ordinansa ang nabase sa kinamatarong sang kada tawo para sa safe kag supisyente nga tubig.