LA CASTELLANA- Nag-evacuate ang 61 ka pamilya ukon 198 ka indibidwal bangod sa pag-awas sang Tamburong Creek sa Barangay Biaknabato, sa banwa sang La Castellana, kahapon nga adlaw, Agosto 31.
Ginpahayag ni Punong Brgy. Joselito Martinez, las-3 tubtob las-5 sang hapon kahapon, nagsugod ang tuman ka baskog nga ulan nga nagresulta sang pagbaha.
Base sa paglaragway sang Punong Brgy., tuman ka baskog sang current ka tubig rason nga nadala sa pag-ilig ang mga bato kag balas nga nagpadulong sa pila ka mga panimalay sa lugar.
Bangod nagtipon ang balas kag bato sa creek, nagpangita sang alagyan ang tubig nga kaangay nga ini ang natunga sa duha.
Ginalantaw ni Martinez nga kun indi makapatigayon sang dredging sa creek may possibilidad nga maubos ang panimalay sa Sitio Tamburong.