Isa ka kasado nga lalaki ang nagakonsiderar sang pagpasaka kaso batok sa isa ka botika matapos sini kontakon ang iya asawa parte sa napaslawan nga e-payment para sa contraceptive medicine kag nakabulgar sang iya pagpakigrelasyon sa iban nga babayi. Ang amo nga lalaki, nga wala ginbuyagyag ang pangalan ang nagkadto sa Pinggang branch sang Dashenlin Pharmacy sa Yangjiang, probinsya sang Guangdong sa diin iya gin-try nga magbayad sang 15.8 yuan ($2.2) para sa mga pills nga pang-kontraseptibo paagi sa iya mobile app. Bangod sang “problema sa sistema,” wala nagdayon ang transaksyon, kag nabal-an lang ini sang empleyado sang botika pagkatapos na siya nakalakat. Gintinguhian sang mga empleyado nga kontakon siya paagi sa numero nga ginparehistro niya sa iya membership card, pero amo ini ang numero sang iya asawa. Sang nagpamangkot ang asawa bahin sa klase sang bulong nga ginbakal, klaro nga ginsabat sang empleyado nga ini para sa mga kontraseptibo nga pills. Ginapahayag sang bana nga bangod sa pagbukas sang ini nga sensitibo nga impormasyon, naguba ang iya marriage kag ang ila relasyon sang iya kerida. Nag-share man ang Chinese nga lalaki sang resibo sang iya ginbakal, screenshot sang chat history sang iya asawa kag sang empleyado sang botika, kag police report nga may petsa Agosto 12 nga ginpagwa sang Pinggang Police Station. Ginpahayag niya nga ginahanda niya ang pagpasaka kaso batok sa botika para sa “invasion of privacy,” apang ginapahayag sang mga legal nga eksperto nga dyutay lang ang iya tsansa nga magdaog.
