Nag-evacuate ang kapin 100 ka mga pamilya gikan sa tatlo ka mga barangay sa La Carlota City sa tunga sang lapnagon nga baha kasunod sang mabaskog nga pag-ulan dala sang low pressure area, Lunes sang aga, Setyembre 1.
Kabug-usan nga 112 ka mga pamilya ukon 389 ka mga indibidwal gikan sa Barangay San Miguel, Barangay Yubonkag Barangay Roberto S. Benedicto ang ginpaidalom sa pre-emptive evacuation kag temporaryo karon nga nagatiner sa mga evacuation centers samtang may iban nga nagdayon sa ila mga paryente.
Pinakamadamo sa mga apektado ang gikan sa Barangay Roberto S. Benedicto nga nagdangat sa 54 ka pamilya ukon 213 ka mga indibidwal.
Gindala sa La Carlota Sugar Central Elementary School ang 25 ka mga pamilya samtang duha ka pamilya ang yara sa RSB Integrated School kag 27 ka mga pamilya ukon 115 indibidwal naman ang nagdayon sa ila mga himata.
Yara sa mga campus sang San Miguel Elementary School sa poblacion kag Sitio Dulom Extension ang 13 ka mga pamilya ukon 40 ka mga indibidwal gikan sa Barangay San Miguel.
Sa Barangay Yubo, 45 ka pamilya ukon 72 ka mga indibidwal ang apektado. 10 ka mga pamilya ang gindala sa Sitio Parkingan Child Development Center kag tatlo ka pamilya ang gindala sa Yubo National High School, samtang 32 ka mga pamilya ukon 96 ka mga indibidwal ang nagdayon sa ila mga himata.
Ang mga internally-displaced persons ang nagbaton sang family food packs gikan sa City Social Welfare and Development Office samtang nanghatag man sang tinapay si Mayor Jose Luis “Joelu” Jalandoni.
Nagapadayon pa ang assessment sa nagkalaguba nga mga pamalay.
[Photos and statistics by La Carlota City PIO]