PROVINCIAL CAPITOL – Ginalauman nga masugdan na sini nga hapon ang pagkali kag paghakot sang nagsupot nga balas kag bato sa Tamburong Creek sa Barangay Biaknabato sa banwa sang La Castellana.
Ini ang ginpahayag ni Atty. Rayfrando Diaz II kasunod sang pag-deploy sang Provincial Government sang mga heavy equipment, nga ginalakipan sang duha ka backhoe kag duha ka dumptrucks, agud magbulig sa pagkalkal kag paghakot sang volcanic materials nga nagpanabaw sang sapa.
Suno kay Diaz, una nga nag-survey si Provincial Engineer Ernie Mapa sa alagyan agud matumod ang access point sang backhoe.
Ang mahakot nga balas kag bato ang pagadal-on sa compound kag nursery sang Mt. Kanlaon Natural Park (MKNP).
Ginpasiguro ni Atty. Diaz nga indi sila magdulog sa pag-dredge sang volcanic materials tubtob nga maglapad kag magdalom na ang alagyan sang tubig.
Nahibaluan nga ginbahaan ang mga pamalay sa palibot sang Tamburong Creek bangud indi na maagyan sang tubig ang sapa matapos ini gintampukan sang balas, bato kag lahar gikan sa Bulkan Kanlaon nga nag-upod sa daludo sang tubig kasunod sang pag-ulan.
Una na nga nagpatigayon sang scraping sang balas kag bato ang La Castellana LGU sa bulig sang DPWH kahapon.