Padayon nga gina-usisa sa karon sang Negros Occidental Police Provincial Office- Special Investigation Task Group (NOCPPO-SITG) ang lima ka mga bangkay nga nasapwan sa Talisay City tinalikdan nga bulan sang Agosto.
Sa interview sang DYHB kay NOCPPO spokesperson PCapt. Judysses Catalogo, ginapahayag sini nga sang gin-activate ang SITG tinalikdan nga August 14, ang nangin focus gid sini amo ang pagkilala sa duha ka mga bangkay sang lalaki bangud “recognizable”’pa ang ila mga nawong.
Duha sa tatlo ka mga bangkay nga nasapwan sang August 11 ang ginkilala sanday Mars Relles, 48, sang Villa Soledad, Brgy. Estefania, Bacolod City kag Alyas “Kokoy” residente sang Candoni kag tumandok sang banwa sang San Enrique.
Samtang, padayon naman ang ila pagpakig-angot sa iban pa nga mga police stations ilabi na sa Bacolod City Police Office naangut naman sa tatlo ka iban pa nga mga bangkay nga yara na sa advanced state of decomposition sang nasawan sa ciudad.
Apang may mga himata naman sang missing persons ang nagpakwa sang DNA samples agud ma cross match sa nagakadunot nga bangkay. Tubtob karon, ginahulat pa ang resulta.
Suno pa kay Catalogo, kada semana man nagapatigayon sang coordinating meeting ang SITG kag kun may yara sang development report ang city/municipal police station, gina-forward man ini gilayon sa SITG agud mas mapadasig ang imbestigasyon.
Padayon nga gina-usisa karon sang otoridad amo ang previous records sang mga biktima. Nagapati man ang mga ini nga posible taga Bacolod ukon sa iban nga banwa kag ciudad sang probinsya ang lima ka mga biktima.