Nagabinuligay paninlo sa mga dalan nga napuno sang lutak kag bato ang mga residente sang Barangay Biaknabato, La Castellana kasunod sang paglapaw sang tubig sa creek tuga sang pagbubo sang makusog nga ulan.
Sa interview sang DYHB kay biaknabato Barangay Kagawad Allan Tomaquin, ginpahayag sini nga nagabulig ang mga tawo sa LGU nga magpanglimpyo sang dalan kag sang ila mga ugsaran.
Suno kay Tomaquin, kapin 70 ka mga pamilya ukon 200 ka mga indibidwal ang nag-evacuate tinalikdan nga dominggo bangud sang pag-awas sang tamburong creek.
Pahayag pa sini nga sang una nga paglupok sang bulkan, nag-awas man ang creek, ginsundan ini sang pila ka mga nagbubo nga ulan tubtob sa ma-flat ini bangud sang mga debris halin sa bulkan.
Ugaling lang, bangud halos katupong na sang dalan ang creek, wala na sang may maagyan pa ang tubig nga naghalin sa bukid tubtob sa nag-ilig na ini sulod sa mga kabalayan.
Ang tubig sang creek ang indi na lapuyot apang gray sa gihapon ang duag sini kag may kaangay nga baho sang lahar.
Agud temporaryo nga matapna ang paglapaw sang tubig sa sapa, temporaryo nga nagpahamtang sang sandbags ang LGU kag barangay.
Ginsugdan naman kahapon pa sang banwa ang scraping sa creek agud nga mahaw-as na ang madamol nga balas nga natipon diri.
Panawagan ni Tomaquin sa Provincial Government kag Department of Environment and Natural Resources (DENR) nga kun tani mapangitaan na sang long term solution ang ila problema agud indi na sila magkahangawa pa.