Ginhingyo ni Negros Occidental Third District Congressman Javier Miguel L. Benitez sa kaangay niya nga mga kongresista nga suportahan ang Climate Accountability Act ukon CLIMA Act.
Sa ginpatigayon sini nga privilege speech sa Kamara sini nga adlaw, Septiembre 3, ginhatagan pagtamod ni Cong. Javi ang handum nga mahatagan sang hustisya ang nagakatabu nga indi patas nga pag-atubang sang mga pungsod sa indi maayo nga epekto sang ‘Climate Change’.
Suno kay Benitez, diri sa Pilipinas, manubo gid lamang sa 0.5 % ang ginatuga nga greenhouse gas emission sang pungsod sa bilog nga kalibutan.
Gintumod ni Cong Javi ang mga mayor nga kompaniya sang fossil fuel ukon ginatawag nga Carbon Majors kag ang malawig na nga mga aktibidad sang mga ini nga amo ang may daku nga epekto sa pag-init sang kalibutan nga nagatuga naman sang climate change.
Samtang, nagpahayag man sang pagsuporta si Cong. Javi sa nagapadayon nga imbestigasyon sa mga flood control projects sa pungsod apang ginklaro sini nga dapat nga hatagan man sang atensyon ang pagpangaman kag paglikaw sa epekto antes pa man magluntad ang mga kalamidad.
Ginpanawagan man sang kongresista sa kamara nga himuon ang ika-20 nga Kongreso nga para sa climate justice, nga mangin maisug nga kongreso sa pagtumod sa mga dapat manabat, kag mangin patas nga kongreso sa pagdampig sa kinamatarung sang mga pumuluyo sa hilway kag luwas nga palibut.