PROVINCIAL CAPITOL – Nag-alokar sang P1 million ang Provincial Government sang Negros Occidental para sa mga heavy equipment nga ginagamit sa paghawan sang Ibid Creek sa Sitio Tamburong, Barangay Biaknabato, La Castellana gikan sa balas kag bato nga ginbuga sang Bulkan Kanlaon.
Ginpahayag ni Provincial Administrator Atty. Rayfrando Diaz II nga magapahamtang sang tangke nga may kapasidad nga 4,000 liters sa lugar agud makapatughong ang mga backhoe kag dumptruck nga nagakali kag nagahakot sang volcanic materials gikan sa sapa.
Kaina sang aga, ginsugdan na ang clearing sang alagyan sang tubig kag suno kay Atty. Diaz, magapadayon ini tubtob nga dalayon na nga maglapad kag magdalom ang sapa.
Target nga mapalapad sang six meters kag mapadalom sang 30 feet ang Ibid Creek agud makaakomodar sang madamo nga tubig pananglitan magtupa ang mabaskog nga ulan kag indi madasig nga maglapaw padulong sa mga pamalay.