Padayon pa ang imbestigasyon sang Criminal Investigation and Detection Group- Negros Island Region (CIDG-NIR) naangut sa kaupdanan sang Chinese National nga si Alyas Allan nga amo ang gin-aresto matapos ma-rekoberan sang P7.8 million nga balor sang smuggled cigarettes.
Sa interview sang DYHB kay CIDG NIR Deputy Regional Director PLtCol. Laurence Gerald Bathan, ginpahayag sini nga ila na-monitor ang masami nga aktibidad sa Barangay Singcang Airport sa diin sang ila ini gin-verify, diri nakita ang bulto-bulto nga mga smuggled nga sigarilyo.
Sa karon, nagapatigayon sang “in-depth” investigation ang CIDG agud matumod kun diin ginabaligya ang ini nga mga sigarilyo kag sin-o pa gid ang iban nga nagabaligya sini.
Nagapati man ang CIDG nga miyembro sang isa ka dako nga grupo si Allan nga amo ang responsable sa baligyaanay sang smuggled cigarettes indi lang sa Bacolod City kundi sa iban pa nga parte sang Negros Occidental.
Nahibaluan man nga nagarenta lang sang balay si Allan sa Barangay Singcang-Airport kag ginaalegar nagpatindog man ini sang balay agud himuon nga warehouse para sa mga smuggled cigarettes.
Dugang pa ni Bathan nga sa ini nga tuig, ini ang pinakadako nga nakumpiska nga smuggled cigarettes sa rehiyon.
Wala man sila sang may makuha pa nga dugang nga impormasyon halin kay Allan bangud nga indi man ini maka-intiyende sang Filipino.
Na-file naman kahapon sang CIDG upod ang Bureau of Internal Revenue (BIR) ang kaso nga Violation of internal revenue code kag disobedience to person’s in authority kontra kay Allan.