Ginbawian sang kabuhi ang isa ka former kagawad matapos ginluthang sang wala pa makilal-an nga suspetsado sa Hda. Cabayao, Brgy. San Pablo banwa sang Manapla, pasado alas-6 kaina sang aga, Setyembre 3, 2025.
Ang biktima ginkilala nga si Alyas Pablo, 54-anyos kag residente sang nasambit nga lugar.
Base sa report sang Manapla Municipal Police Station, nga suno sa pila ka mga saksi nagpakuno-kuno ang suspek nga nagapangita sang iya nadula nga karabaw samtang nagapamangkot kun diin ang balay sang biktima.
Naggwa naman si Pablo sa iya balay kag naka-istorya pa sa suspek apang hinali lang nga ginluthang ini kun sa diin naigo sa ulo kag naglain-lain nga parte sang iya lawas.
Kasunod sini, nagsulod pa ang suspek sa balay sang biktima, nagpamahog sa pamilya kag madasig nga nagpalagyo.
Narekober gikan sa crime scene ang napulo ka empty shells Calibre .45 kag isa ka live ammunition.
Sa karon, padayun nga ginapatigayon sang kapulisan ang imbestigasyon kag hot pursuit operation agud madakpan kag makilal-an ang may kahimuan sang krimen.
[Photo from Manapla MPS]