Ginatumod pa sa karun sang Bacolod City Police Station 1 ang suspek nga nagluthang sa isa ka negosyante sa atubang mismo sang iya kaugalingon nga hardware store sa dalan Bonifacio, sakop sang Barangay 12, pasado las-7 sang aga, Setyembre 9.
Ang biktima ang ginkilala nga si Romi Li, 52-anyos, kag residente sang Brgy. Taculing.
Ginpahayag ni Police Captain Francis Depasucat, Station Commander sang PS1, nagatipon sa karun sang cctv footage ang kapulisan agod matumod ang suspek sa krimen.
Angot sa background sang biktima, magluwas nga ini ang isa ka negosyante, ginpahayag ni Depasucat nga, “naga-supply man ini siya sang mga construction materials kag nagaintra sa biddings, pribado or pampubliko nga mga projects.”
Base sa inisyal nga imbestigasyon sang kapulisan, ang biktima ang bag-o lamang panaog sa iya nga salakyan kag natalana kuntani magbukas sang iya nga balaligyaan, sang hinali may nagpalapit nga wala makilala nga suspek kag ini ang ginluthang.
Nakaagom sang pilas sa tangkugo ang biktima, nga nangin resulta sang iya kamatayon.
Matapos ang krimen, nagdalagan ang suspek kag nagsakay sa isa ka ginapatihan SUV sa bahin sang dalan Luzuriaga.
Narekober sa crime scene ang duha ka basiyo sang wala pa matumod nga short firearm.
Dugang pa ni Depasucat, ginausisa pa sa karun ang background sang biktima agod matumod kun ano ang motibo sa pagpangluthang.