Age doesn’t matter siling gani nila. Makapila na ini naton mabatian apang madamo sa gihapon sang nagapamatuod sini.
Kaangay na lamang sang magnobyahanay sa Japan sa diin na-in love ang 23 anyos nga si Kofu sa 83 anyos nga si Aiko nga lola sang iya classmate.
Isa ka tumalagsahon nga hitabo nga indi man aprub sa panulukan sang iban, ang importante, matuod ang ila nabatyagan.
Natukiban ang ila love story sang gin-interview sila sa dalan sa diin ginpakigbahin ni Aiko nga na timing sa Valentine’s Day ang ila nga anibersaryo.
Suno sa report, si Aiko ang isa ka horticulturist kag nagapanag-iya sang dako nga botanical garden.
Makaduha siya ka beses nga nagpakasal kag may isa ka anak nga lalaki, isa ka babayi kag lima ka mga apo. Pagkatapos sang iya divorce, nagpuyo siya upod sa pamilya sang iya anak nga lalaki.
Si Aiko ang nagasunod sa iya healthy lifestyle, manami ang iya mga bayo kag ginapabilin ang bataon nga aura.
Samtang si Kofu naman ang madali nalang nga maggradwar sa kolehiyo kag isa ka intern sa isa ka creative design company.
Nagkitaay ang mga ini sang nagbisita si Kofu sa balay sang iya classmate nga apo ni Aiko kun sa diin, na-love at first sight siya diri.
Sa subong, magka-upod nga nagapangabuhi ang duha kag suportado sila sang ila tagsa ka pamilya.