Mainit nga gintalakay ang ginaduso nga “Ordinance Regulating the Entry of Genetically Modified Organism in Negros Occidental” sa ginhiwat nga public hearing sa session hall sang Sangguniang Panlalawigan kaina sang aga.
Ang public hearing ang gin-preside ni Third District Board Member Andrew Gerard Montelibano, nga amo ang chairman sang Committee on Agriculture kag Committee on Environment sa Provincial Board.
Nagtambong man si Provincial Administrator Atty. Rayfrando Diaz II, Provincial Legal Officer Atty. Alberto Nellas Jr., mga board members kag stakeholders nga ginalakipan sang mga mangunguma, farm owners kag nagatib-ong sang organic agriculture kag subong man ang mga nagapabor sa pagsulod sang GMO sa probinsiya.
Naghatag sang presentasyon si Reynante Ordonio, PhD nga Scientist I sa Philippine Rice Research Institute sa idalom sang Department of Agriculture, agud lubos nga mapaathag ang genetically modified organism (GMO).
Nagpabutyag man sang tagsa nila ka mga panan-awan ang mga mangunguma kag farm owners angot sa GMO.
Isa diri si Ace Dedoroy sang Bago City nga nagpabutyag nga sa baylo nga pasudlon ang GMO, nga ginalantaw may malain nga epekto sa lawas, mas maayo nga gamiton na lang ang naga-eksister nga mga kagamitan kag conventional nga pamaagi sang pagpanguma agud mapasanyog ang agrikultura.
Sabat naman ni Atty. Diaz, sa sulod sang 18 katuig nga pagtib-ong sang organic movement, pipila pa lamang ang mga mangunguma nga may certification sa Good Agricultural Practices ukon GAP.
Dugang pa sini, indi pa matungdan ang kabug-usan nga kinahanglanon sa pagkaon sang tawo, lakip na ang mais, nga sarang man magamit sa paghimo sang feeds para sa mga kasapatan.
Panghangkat ni Diaz, pasanyugon sang mga nagakontra ang ila nga organic movement nga wala sang suporta sang Provincial Government.