Duguon kag wala na sang kabuhi ang isa ka tag-iya sang hardware sa Bonifacio Street, atubang sang Central Market, Bacolod City matapos ini ginluthang sang wala pa makilala nga suspetsado.
Ang biktima ang ginkilala kay Romy Lee, 56 anyos residente sang Bacolod City.
Sa interview sang DYHB kay Alyas Nonoy, ginpahayag sini nga pasado las 6 kaina sang nagtabo sila sa isa ka warehouse ni Romy sa Taculing agud nga ululupod sila kadto sa shop.
Gilayon man sila naghapit sa balay sang iloy ni Romy agud nga makaupod nalang ini kag ang iya nga caregiver.
Suno kay Nonoy, kapin lima sila tanan nagasakay sa innova ni Romy kag sang ila pag-abot sa shop kag pagpanaog ni Romy, gilayon sini gin buksan ang roll up door apang didto hinali siya gintiro sang isa ka tawo nga naka itom bayo, shorts kag mask.
Pagkatapos sang pagpanluthang, nakita nga gilayon ini nagsakay sa isa ka salakyan kag nagpalagyo.
Duha naman ka lupok ang nabatian nila ni Nonoy.
Ginlagas pa sang iban nila ka mga kaupdanan ang suspek apang wala na ini maabtan pa.
Suno kay Nonoy, wala gid kontra si Romy amo kun ngaa makatingalahan gid kun ngaa gin-ubra ini sa iya.