Halin sa ilimnan ang duha ka biktima nga nautas ang kabuhi sa aksidente nga nagluntad sa bahin sang dalan Lopez Jaena sakop sang Barangay Villamonte sa ciudad sang Bacolod, pasado las-4 sang kaagahon, Setymebre 10.
Ang biktima nga driver sang motorsiklo ang ginkilala nga si alias “John Denz”, 21-anyos, residente sang Brgy. Handumanan, samtang ang backrider sini amo si alias “John Wennel”, 21-anyos, sang Brgy. Felisa.
Base sa pahayag ni Police Major Elmer Bonilla, head sang Bacolod City Police Office- Traffic Management Unit, ang motorsiklo ang naga-usoy sa direksyon nagikan BS Aquino Drive padulong dalan Lopez Jaena sang nadulaan ini sang kontrol kag aksidente nabungguan ang konkreto nga bahin sang poste nga yara sa center island nga nagresulta sa pagkatumba sang driver kag backrider.
Bangod sa naagom nga head injury sang duha, sila ang ginbawian sang kabuhi.
Suno kay Bonilla, wala sang may narekober nga helmet sa lugar; base sa pagpangusisa, sila ang nagikan sa ilimnan kag yara sa impluwensya sang makahulubog nga ilimnon bangod sila ang nagtambong sa kaadlawan sang ila abyan.
Gina-alegar madasig ang pagmaneho sang driver sang nagluntad ang aksidente.