Naglab-ot na sa 20 ang kaso sang leptospirosis nga na-record sang City Health Office (CHO) sa ciudad sang Bacolod humalin Enero tubtob Agosto 30, 2025.
Sa pinakaulihi nga datos nga ginpagwa sang CHO, nagapabilin nga yara sa anom ang probable death sang nasambit nga sakit.
Ini ang mas mataas sang 17.6 percent kumparar sang nagligad nga tuig sa pareho nga period nga may yara sang 17 ka kaso kag anom man ang sa mga ini ang nagtaliwan.
Ang leptospirosis isa ka sakit nga gintunaan sang bacteria kag makuha ini pinaagi sa ihi sang mga sapat nga may leptospira pareho sang mga ilaga.
Makasulod ini sa lawas sang isa ka tawo pinaagi sa mga pilas ukon mata, ilong, kag baba.
Ang pila sa mga sintomas sini amo ang hilanat, pagpula sang mata, sakit sa tiyan kag ulo, kag nabudlayan sa pagpangihi.
Malikawan ini sa paglikaw sa paglangoy ukon pag-ubog sa tubig baha, pagsuksok sa botas kag gloves kun tag-ululan, kag pagpabilin nga matinlo ang balay kag palibot.