Ginalantaw nga magalawig sang isa katuig ukon masobra pa antes maubos sa paghakot ang nagsupot nga volcanic sediments sa Ibid Creek nga nahamtang sa Sitio Tamburong, Barangay Biaknabato, La Castellana.
Ginpahayag ni Remuel Lajo, incident commander sang La Castellana Incident Management Team (IMT), nga yara pa lamang sa 808 cubic meters sang balas kag bato ang nahakot sa sulod sang isa ka semana nga operasyon, base sa record sang PDRRMO.
Ini ang tuman kagamay kun ikumparar sa 28,000 cubic meters nga halakuton gikan sa sapa.
Suno kay Lajo, madamo pa sang nagsupot nga balas sa ibabaw kag mahimo nga magdalusdos pa ang mga ini kun mag-ulan-ulan.
Sa karon, maayo ang panahon kag tayuyon pa ang operasyon apang nagapabilin nga pagpanghangkat ang kadamuon sang heavy equipment nga ginagamit sa pagkalkal kag subong man sang dump trucks nga nagahakot sang volcanic sediments agud itampok sa MKNP compound.
Dugang pa sini, nag-bogdown pa ang isa ka payloader nga gin-deploy sang probinsiya.
Nahibaluan nagpadala ang Capitolio sang duha ka heavy equipment kag tatlo ka dumptrucks samtang nagabulig man ang truck sang banwa apang nagalaum si Lajo nga madugangan ini agud mangin mas madasig ang clearing operation sa creek.*Remuel Lajo Photo