Isa ka gun for hire ang suspek sa pagluthang sa negosyante sa dalan Bonifacio sakop sang Barangay 12 sa ciudad sang Bacolod, Martes sang aga, September 9.
Ang biktima ang ginkilala nga si Romi Li, 52-anyos, nagapanag-iya sang isa ka hardware store, kag residente sa amo nga ciudad.
Ginpahayag ni Bacolod City Police Office Director Police Colonel Joeresty Coronica, na-identify na ang suspek nga nagluthang kay Li pinaagi sa imbestigasyon sang kapulisan kag sa bulig sang mga pumuluyo nga nakasaksi sa insidente.
Nakilala ang suspek bangod ang litrato sini ang gintudlo sang mga saksi sang ginpresentar sang kapulisan ang mga laragway sang mga possible gun for hire sa ciudad kag sa probinsya.
Ang possible suspek sa krimen ang may kaso nga frustrated homicide kag paglapas sa Republic Act 10591 ukon Comprehensive Firearms and Ammunition Regulation Act, kag ini ang nakaagi dakop apang nagpiyansa kag wala na nagpakita sa hearing.
Sa karun padayon ang pagpakig-angot sang kapulisan sa pamilya sang biktima agod matumod ang motibo sa krimen kag kun ini bala ang may angot sa negosyo ukon personal.