Nagahingyo sa publiko si EB Magalona Vice Mayor Marvin Malacon nga magkooperar sa kapulisan pananglitan may ihibalo kag impormasyon sang isa ka preso nga nakapalagyo sa kustodiya sang EB Magalona PNP tinalikdan nga Setyembre 9.
Ang nagpalagyo nga preso ginkilala nga si Eduardo Sadia, alyas Bebeng, 58-anyos, isa ka manug-pangisda kag residente sang Sitio Panaosawon, Brgy. Tuburan sang nasambit nga banwa.
Sa interview sang DYHB kay Malacon, nagapanugyan ini sa mga Saraviahanon nga mangin vigilante kag gilayon nga magkoordinar sa kapulisan pananglitan may yara sang impormasyon may angut sa lokasyon sang preso.
Pahayag sang bise alkalde, suportado sang lokal nga pamunuan sang banwa ang tikang nga ginahimo karon sang kapulisan agud liwat nga madakpan si Sadia.
Nahibaluan nga ginmandu na ni PRO-NIR Director PBGEN Arnold Thomas Ibay ang the Negros Occidental Police Provincial Office (NOCPPO) nga mas pasangkaron pa ang province-wide dragnet kag manhunt operation kag mas hugtan ang security protocols sa tanan nga custodial facilities sa bilog nga probinsya kag bug-os nga NIR agud indi na matabo ang kaangay nga insidente.
[Photo from Saravia-EB Magalona Facebook]