Isa ka bata sa Shanghai, China, ang wala matagaan sang birth certificate kag wala maschedule para sa mga bakuna bisan isa na ka tuig ang edad, tungod wala nagkasugot ang iya ginikanan sa pagpili sang ngalan.
Isa ka hearing sa divorce case ang ginpatigayon sa Pudong New Area People’s Court sa Shanghai naangut sa mag-asawa nga nagparehistro sang ila kasal sang 2023 kag nagka-baby sang masunod nga tuig.
Halin didto nagsugod na ang problema sang wala sila magkasugot sa ngalan sang bata. Gininsistir sang kada isa nga sila ang masunod sa pagpili sang ngalan kag nagapangayo sang orihinal nga mga dokumento kag power of attorney sa isa kag isa, pero wala gid sang may nagpapirdi.
Base sa ebidensya nga ginpresentar sa korte, nagkadto sila sa ospital nga indi upoday para iparehistro ang ila gusto nga ngalan para sa bata, pero gin-deny ang ini nga mga forms tungod wala nagasunod sa mga regulasyon.
Ginpahayag sang korte nga masobra isa na ka tuig ang bata, pero wala pa gani birth certificate.
Ginpabutyag sang korte nga ang birth medical certificate isa ka importante nga basehan para ang isa ka newborn makakuha sang legal nga identidad.
Kung ang ginikanan magpadugay sa pagproseso bangod sang personal nga indi pag ilinchindihanay, ini isa ka paglapas sa personal nga katungdanan sang menor de edad kag dapat manabat ang duha ka ginikanan.
Ginpaandaman man sila nga indi dapat himuon sang mga ginikanan nga panagang ang ila bata sa mga away emosyonal.
Agud maprotektahan ang mga bata kag kinamatarong sini, nag-issue ang korte sang special nga “Notice of Care for Minor Children” nga naga-require sa duha ka ginikanan nga magbinuligay sa pagkuha sang birth certificate sa gin-set nga oras. Apang, liwat sila nga naglalis parte sa kustodiya sang orihinal nga mga dokumento.