Igaplastar sang Bacolod City Government ang mga kinahanglan sang mga pumuluyo nga apektado sa nagluntad nga sunog sa dalan Lopez Jaena, Barangay 27, ciudad sang Bacolod sini nga kaagahon, Setyembre 12, 2025.
Suno kay Mayor Greg Gasataya, pagatawgan sini ang Department of Social Services and Development (DSSD) kag City Health Office (CHO) agud maplastar ang mga igahatag nga bulig sa mga apektado kag igapreparar man ang evacuation center nga ila pagagamiton.
Dugang pa sini, automatic man nga mahatagan sang assistance ang mga apektado apang sa subong ginasiguro pa nga ma-clearing ang lugar nga ginatugyan sa karon sa mga katapo sang Bureau of Fire Protection kag pila ka mga volunteer.
Importante naman sa alkalde nga ginsalbar sang mga pumuluyo ang ila kabuhi bangud nga magahatag gid ang ciudad sang maximum nga ayuda para sa ila.