Si Vitomir Maričić, isa ka freediver halin sa Croatia, nakapugong sang iya pag ginhawa sa sulod sang 29 minutos kag tatlo ka segundo sa tatlo 3 metro nga kadalumon nga pool. Ang ini nga record ni Vitomir ang mas sobra sang lima ka minuto sang sa una nga may uyat sang nasambit nga record. Madamo sa aton ang makapugong lang sang ginhawa sulod pila ka segundo tubtob pila ka minutos, pero kun may husto lang nga training, may iban man nga tawo nga daw superhuman, sila ang makapugong sang ginhawa sa idalom sang tubig sang madugay nga tinion, sila ginatawag nga mga freedivers. Paagi sa madugay kag mabudlay nga physical kag mental training—lakip na ang diaphragmatic breathing, cardiovascular exercise, kag meditation—nakaobra sila sang mga butang nga daw indi mahimo sang ordinaryo nga tawo. Sa normal nga kondisyon, si Vitomir Maričić makapugong sang iya ginhawa idalom sang tubig sulod 8 tubtob 10 ka minutos. Pero para mapa-extend pa ini, naga-ginhawa anay siya sang pure oxygen sulod 10 ka minutos antes magsulod sa tubig. Ini ang technique kun ngaa makapadamo siya sang lima ka beses nga normal nga oxygen sa iya dugo, nga nagbulig sa iya nga makapugong ginhawa sang mas madugay. Apang delikado man ang pag-inhawa sang pure oxygen tungod nga mahimo ini magdala sang oxygen toxicity nga sarang makautas sang kabuhi ka tawo.
