Nakaagom sang pilas ang duha ka mga lalaki matapos nga ginlabo samtang naga-inom sa Purok 7, Malipayon, Barangay Bulata, Cauayan alas-5:30 sang hapon kahapon nga adlaw, Setyembre 17, 2025.
Sa imbestigasyon sang Cauayan Municipal Police Station (MPS), nag-agi ang suspek nga ginkilala kay alyas “Lucas”, 50-anyos sa naga-inom nga mga biktima nga 53-anyos kag 34-anyos nga mga lalaki kag gin-istorya niya ini.
Naglab-ot sa pagbinaisay ang pagistoryahanay sang mga imbolbado sa insidente kun diin nagtulod ini sa suspek nga hunuson ang iya binangon kag labuon ang mga biktima.
Nagpalagyo naman ang suspek matapos nga gin-obra ang krimen kag ini man ang naaaresto sang mga katapo sang Cauayan MPS sa ginpatigayon nga pursuit operation.
Gilayon man nga gindala sa Merceditas J Montilla District Hospital sa ciudad sang Sipalay ang mga biktima para sa nakaigo nga pagbulong.
Sa karon, yara na sa kustodiya sang Cauayan MPS ang suspek para sa nakaigo nga disposisyon.