Isa ka 11-anyos nga bata sa Changsha, China, ginkinahanglan sang bulig medikal matapos siya nag-ubra sang assignment kag nagtuon sa sulod sang 14 ka oras nga wala untat, samtang ginabantayan sang iya mga ginikanan.
Indi na sekreto ang obsesyon sang China sa academic excellence, pero sa pila ka sitwasyon, ini mahimo gid nga magbutang sang kabuhi sang kabataan sa peligro.
Isa ka example amo ang 11-anyos nga bata nga gindala sa ospital matapos nag-ubra sang assignment halin alas-8 sang aga tubtob alas-10 sang gab-i nga wala untat.
Pag-abot sang alas-11 sang gab-i, ang bata nag-panic, nagdali ang iya pagginhawa, nakabatyag sang kalingin kag kasakit sang ulo kasubong man pagpaman-ol sang iya mga parte sang lawas. Ang iya ginikanan nga nagabantay sa iya bilog nga adlaw ang nag-panic man kag gindala siya sa ospital, diin siya gin-diagnose sang problema sa pagginhawa bangud sang hyperventilation.
Natabo ang insidente tinalikdan nga bulan, kag ang bata nga ginhingalan lang nga si Liangliang, ginbutangan sang doktor sang breathing mask kag ginpahanumdom nga kontrolon ang iya pagginhawa.
Ang iya kondisyon ang ginapatihan naghalin bangud sang emosyonal nga pressure nga ginhatag sang iya ginikanan nga nagapaubra sa iya assignment sa sulod sang 14 ka oras nga wala untat.
Ang mga sintomas nga konektado sa sini nga klase sang kondisyon sa pagginhawa nagalakip sang paghugot sang dughan, kabudlay sa pagginhawa, kalipong, kag pagpalaman-ol sang mga kamot, batiis kag bisan sang bug-os nga lawas.
Sa mas grabe nga kaso, mahimo ini magresulta sa pagpanig-a sang mga muscle ukon ginatawag nga “chicken hand” nga may pagkurog sang tudlo. Kon indi mahatagan gilayon sang medikal nga atensyon, mahimo madulaan sang kabuhi ang pasyente.