Anay army dakop sa drug buy bust operation sa Brgy Tangub
BACOLOD CITY- Dakop sa drug buy bust operation ang isa ka anay army sa Bangga Akina, Barangay Tangub, Bacolod City, pasado las-2 sang kaagahon, Setyembre 19.
Ang suspek ang ginkilala nga si alias “Jiljil”, 44-anyos, residente sang Barangay 3 sa ciudad sang Sipalay kag temporaryo nga naga-istar sa Barangay 19 sa ciudad sang Bacolod.
Base sa pahayag ni Police Lieutenant Ildefonso Leonard, Deputy sang Bacolod City Police Station 8, narekober sa anay army ang ginabulubanta 51 grams sang ginapatihan shabu nga nagabalor ₱346,800.
Sa inisyal nga impormasyon, nag-AWOL ukon Absent Without Official Leave ang suspek sa Philippine Army.
Suno kay Leonard, wala sang rekord nga nakaagi preso Jiljil apang possible siya ang nagasupplay man sang illegal nga droga sa ciudad.
Preso sa karun ang suspek sa Police Station 8 kag natalana nga magapangatubang sang kaso nga paglapas sa Republic Act 9165 ukon Comprehensive of Dangerous Drugs Act of 2002.