Handa nga mag-resign si Mayor Greg Gasataya kon mapamatud-an nga may nawong kag ngalan sini ang ginapanagtag nga school supplies sa mga elementary pupils sa Bacolod.
Ini ang matigdas nga pahayag sang alkalde matapos naglapta sa social media ang litrato sang mga notebooks nga may nawong kag ngalan sini nga ginapahayag amo ang ginpanagtag sa mga estudyante.
Apang ang matuod, wala sang logo sang ciudad, wala sang nawong kag ngalan sang alkalde ang ginpanagtag nga school supplies.
Ginahangkat ni Mayor Gasataya ang nagapalapta sang mga litrato nga magpakita sa iya kag dal-on ang mga notebooks nga may ngalan kag nawong sini.
Kon wala sang mapakita nga pruweba, fake news kag binutig ang ginahimo sang mga ini suno sa alkalde.
Nagapanugyan si Mayor Gasataya nga indi na magdugang sa mga problema sa ciudad. Nagapanugyan man ini sa mga pumuluyo nga i-validate ang mga impormasyon kag indi dali-dali magpati.