Nagsaka sa kapin Php 0.7715 per kilowatt-hour ang presyo sang kuryente sang Negros Power sini nga bulan sang Setyembre.
Halin sa P 11.5060/kWh sang Agosto, karon yara na ini sa P12.2775/kWh sini nga bulan.
Suno sa Negros Power, ila gid naintindihan ang importansiya sang makasarangan nga presyo sang kuryente sa kada panimalay kag negosyo.
Ginpabutyag man sini nga ang pagsaka sang monthly bill ang bug-at para sa tanan amo kun ngaa gusto nila mangin transparent sa mga rason nga nagaapekto sa September 2025 rates.
Ang ini nga adjustment sa presyo sang kuryente ang bangud sang mga butang nga indi nila ma-control.
Sa una nga interview sang DYHB kay Negros Power Energy Sourcing Manager Engr. Christian John Villena ginpahayag sini nga ang Visayas grid ang naka-eksperyensya sang supply shortages nga nagtuga sang Yellow Alerts, patimaan nga ang available power reserves ang padayon nga naganubo.
Ini ang nagpasaka man sang generation cost sa Wholesale Electricity Spot Market (WESM).
May angut sini, ginpasiguro man sang Negros Power nga padayon sila nga mangin transparent kag efficient kasubong man sa pagtrabaho kaupod sa mga power suppliers kag regulators agud masiguro nga mangin manageable ang presyo sang kuryente.